Grunneger recept veur Arretjescake..
Tuesday 20 March 2007
Wat mout der in:

Twijenhaalf onze meelkoekjes, twinteg gram sukkeloapoeier, twijenhaalf onze botter, twij hounderaaier, twij onze widde basterd sukker.

Hou mout je t doun:

Kwengel de aaier, de sukker en de sukkeloapoeier deur n ander hén tot n smeuig gehail.
Breek alvast de meelkoekjes in leutje stukjes van omenbie n sentimeter.
Loat de botter langzoam smelten in n pannegie, moar t mag nait broen worden.
Dou de botter en de koekjes deur de sukkeloaboudel hén en moak der n mooi gehail van.
Dou nou de haile brut in n keekvörm en loat dat twij uur opstieven in koelkaaste.
Joen arretjeskeek is kloar veur konsumsie.

As tip; eet der nait te veul van, omreden t is verrekte machteg.

Dit recept komt van de site     http://www.dideldom.com/

Vanwoar dij noam Dideldom? Ja, om t even nijmoods te zeggen t bekt wel lekker, Dideldom punt com.
As ie n aander vertellen willen woar ie west binnen op t Internet den zeggen ie 'Dideldom punt com'.
Perbaaier mor aains, t is nait stoer te onthollen.

 
< Vorige   Volgende >